ل رۆژا سێشەمبێ رێکەفتی ٢٨/٠٤/٢٠٢٦ پشکا پلاندانانا جهی وورکشۆپەک ل دۆر گونجاندنا پڕۆگرامێ بەکالۆریۆسێ یێ پلاندانانا جهی (Spatial Planning) دگەل پڕۆگرامێ زانکۆیا تی یۆ دۆرتمۆند (TU Dortmund) یا ئەلمانی ئەنجامدا.
وورکشۆپ هاتە تەرخانکرن بۆ دیارکرنا ئەنجامێن هەڤبەرکرنەکا گشتگیر د ناڤبەر رێبەرێن یەکەیێن خواندنێ (Module Manuals) یێن هەردوو زانکۆیان. ئەڤ پێنگاڤە کارەکێ سەرەکییە بۆ ب هێزکرنا پڕۆگرامێ هەڤپشک و پشتەڤانیکرنا بزاڤێن وەرگرتنا دانپێدانەکا ئەلمانی (German Accreditation) بۆ مسۆگەرکرنا پڕۆگرامەکێ خواندنێ یێ هەڤچەرخ و نێڤدەولەتی.

د دانوستاندنان دا رەوشا نوکە یا پڕۆگرامێ خواندنێ هاتە دیارکرن:

• هژمارەکا یەکەیێن خواندنێ ب شێوەیەکێ باش د گونجاینە دگەل پیوەرێن زانکۆیا دۆرتمۆند.
• هندەک یەکەیێن دی پێدڤی ب دەستکاریێن کێم هەنە بۆ گەهشتن ب گونجاندنا تەمام.
• هندەک یەکەیێن تایبەت هاتنە دەستنیشانکرن کو پێدڤی ب گوهۆڕینێن ریشالی هەنە دا کو دگەل پێکهاتە و پیوەرێن پڕۆگرامێ ئەلمانی بگونجن.
• ل دویڤ ئەنجامان، مامۆستا هاتنە راسپاردن ب ئەنجامدانا ئەرکێن تایبەت بۆ نویکرنەوە و دارشتنا یەکەیێن خواندنێ.
• 
  ئارمانجا گشتی تەمامکرنا هەمی نویکرنەوێن پێدڤی یە و جێبەجێکرنا پڕۆگرامێ گوهۆڕی بۆ سالا خواندنێ ٢٠٢٦-٢٠٢٧. ئەڤە دێ مسۆگەر کەت کو پڕۆگرامەکێ هەڤساز و هەڤتەریب دگەل پیوەرێن کوالیتیا نێڤدەولەتی هەبیت.

گونجاندن دگەل پلانا ستراتیژی یا زانکۆیا دهۆکێ
ئەڤ چالاکی پێگیریێ ل پلانا ستراتیژی یا زانکۆیا دهۆکێ (٢٠٢٣-٢٠٣٨) دکەت ب رێکا:

• ب هێزکرنا هەماهەنگی و هەڤپشکیا ئەکادیمی یا نێڤدەولەتی.
• بلندکرنا ئاستێ شیانێن ستافێ ئەکادیمی.
• پێشخستنا رۆڵێ زانکۆیا دهۆکێ د ناڤدەولەتیکرنا خواندنێ و ڤەکۆلینێن زانستی دا.