کۆلیژا پلانسازیا شار و هەرێمان ل زانکۆیا دهۆک، ب هەڤکاری دگەل ڕێکخراوا VNG International، سیمینارەکا ئاست بەرز برێڤەبر. د ئەڤێ سیمینارێ دا ژمارەکا بەرپرسیار و رێڤەبەرێن حکومی بەشدار ببوون، ژ وان ژی: قایمقامێ دهۆکێ رێزدار (بریندار حيدر عبداللە)، سەرۆکێ سەندیکا ئەندازیاران ل دهۆکێ رێزدار (علي نعمت)، سەروکێ ژوورا بازرگانیا دهوکێ رێزدار(شکری جەمیل)، رێڤەبەرێ رێڤەبەریا ئاڤا دهوکێ رێزدار (بشار حاجی)، نوێنەرێن ڕێڤەبەریێن ئاڤێ، ئەندازیارێن ڕێڤەبەریێن پەیوەندیدار، دگەل مامۆستا و قوتابیێن کۆلیژێ.

پەیڤێن ڤەکرنێ و دەستپێکا سمینارێ

سیمینار ب پەیڤا بخێرهاتنێ ژ لایێ م. سمير هاشم محي الدين هاریکارێ ڕاگرێ کۆلیژێ دەستپێکر کو ئاماژە دا ب رۆلێ زانکویێ و ب تایبەتی کولیژا پلانسازیا شار و هەرێمان د گەل سازیێن حکومی بو بابەتێن گرێدایی ب پلانسازی و خزمەتگوزاریا باژێری، پاشان خانم ڕەوشەن ئەترووشی، سەرپەرشتا VNG International ل عیراقێ ڕۆلێ ستراتیجی یێ ڕێکخراوێ د هەڤکاریا بەردەوام دگەل زانکۆیێ و ڕێڤەبەریێن حکومی دا دیارکر.

سیمینار ل ژێر ناڤونیشانێ «ڕەوشا ئاڤێ ل دهۆکێ: ئاستەنگ، دەرفەت، و ئاراستەیێ کەرتێ گشتی» کو هاتە پێشکێشکرن ژ لایێ ژمارەکا رێڤەبەرێن رێڤەبەریێن ئاڤێ ل پارێزگەها دهوکێ.

تەوەرێن سەرەکی یێن سیمینارێ:

• هەلسەنگاندنا ژێدەرێن ئاڤێ و کەمکرنا مەترسیێن لافاوان: ئەندازیار هێژا عبدالواحد، ڕێڤەبەرێ ئاڤدێریێ ل پارێزگەها دهۆکێ، ئاستێ ژێدەرێن ئاڤێ و پێشهاتێن لافاوێن ساڵێن بووری پێشکێشکرن، دگەل خستنەڕویا پلانێن کرداری بۆ کێمکرنا مەترسیێن لافاوا ڕووبارێ هشکەروو.
• ئاڤا ڤەخوارنێ و ئاستێ بکرئینانێ: ئەندازیار خەڵات فتاح، ڕێڤەبەرێ ئاڤا دەوروبەران ل پارێزگەها دهوکێ، تەرکیز کرە سەر ئاڤا سەرئەردی، پڕۆژەیێن چالاک، بیرێن ئاڤێ، و بکارئینانا ئاڤێ ل سەر ئاستێ پارێزگەهێ.
• ژێرخانا ئاڤەڕۆ یا شارستانی: ئەندازیار یونس جانو، ڕێڤەبەرێ ئاڤ و سولینان ل پارێزگەها دهۆکێ، شیکارکرن بۆ سیستەمێ تۆڕا ئاڤەڕۆیا باژێڕی و ئەو ئاستەنگێن تەکنیکی یێن کو ڕووبەڕووی سیستەمی دبن کر.

بەرزی و ئارمانجا ستراتیجی

وەکی بەشەک ژ رێککەفتنا دگەل شاره‌‌وانیا ڕیدەن (Rheden) یا هۆلەندی، باژێرێ دهۆکێ "جڤاتا گەشەپێدانا بەردەوام" (SDB) ل سەر بنەمایێ مۆدێلا سیانی (Triple Helix) - هەڤکاریا حوکمەت، زانکۆ، و کەرتێ تایبەت دامەزراندییە. ئەڤ جڤاتە ب شێوەیەکێ فەرمی وەک دەستەکێ ڕاوێژکاری یێ بەردەوام بۆ سەرۆکاتیا شارەوانیا دهۆکێ هاتینە دەستنیشانکرن، کو ئەندامێن وێ پێکهاتینە ژ: سەرۆکێ شارەوانیا دهۆکێ، سەرۆکێ ژوورا بازرگانی، و نوێنەرەکێ زانکۆیا دهۆکێ.

ئەڤ سیمینارە هاتە ڕێکخستن وەک بەشەک ژ هەوڵێن جڤاتێ بۆ چاڤدێریکرن و هەڵسەنگاندنا ڕەوشا ئیداری یا دابینکەرێن خزمەتگوزاریێن گشتی د کەرتێ ئاڤێ دا، ب ئارمانجا دیارکرنا ئاستەنگان و ڤەکۆلینێ د دەرفەتێن هەیی دا.