د پێنگاڤەکا گرنگ دا بەرەف پێشخستنا گەشەپێدانا باژێڕی یا بەردەوام و چالاکیا سەقا و ژینگەهێ، قوتابیێن پشكا پلانسازیا شار ل کۆلێژا پلانسازیا شار و هەرێمان ل زانکۆیا دهۆکێ (UOD)، ب شێوەیەکێ کارا پشکدار بوون د ڕاگەهاندنا "تۆڕا دوومدرێژیێ" (Sustainability Network) دا، کو ئێکەمین دەستپێشخەرییە ل سەر ئاستێ دهۆکێ.

ئەڤ چالاکیە ل رەژا دووشەمبێ رێکەفتی ٢٩ێ حوزەیرانا ٢٠٢٦ێ هاتە گێران. ڕاگەهاندنا ڤێ تۆڕێ و چالاکیێن وێ یێن کرداری و بەرفرەهـ یێن مەیدانی دگەل ڕێکخراوا "یەک دار" یا هۆشیاری و پاراستنا ژینگەهێ ل کوردستانێ هاتبوو ڕێکخستن و جێبەجێکرن. ئەڤ هەماهنگیا سەرکەفتی هاتیە ڕێکخستن ژ لایێ م. ڤەژین کاوە محموود و م. هەکار صبحي إسلام.

بۆ دەستپێکرنا کارێن تۆڕێ، نوێنەرێن ڕێکخراوا "یەک دار" دگەل قوتابیێن پلانسازیا شار، ئێکەمین چالاکیا خۆ بن ناڤێ "ڕۆژەکا پڕی دوومدرێژیێ" ئەنجامدا، کو ژ لایێ سندوقا (AFS Assembly Network Fund) ڤە هاتبوو پشتەڤانیکردن. ڕۆژ ب سمینارەکا چڕ دەستپێکر کو تیشک خستە سەر ئارمانجێن گەشەپێدانا بەردەوام یێن نەتەوەیێن یەکگرتی (SDGs)، ب تایبەتی ئارمانجا ١١ (باژێڕ و کۆمەڵگەهێن بەردەوام) و ئارمانجا ١٣ (پاراستنا سەقای).

پشتی سمینارێ، بەرپرسێن ڕێکخراوا "یەک دار" دگەل قوتابیان سەرەدانێن مەیدانی یێن بەرفرەهـ بۆ دەڤەرا پیشەسازی یا کواشێ برن، کو ل وێرێ ژ نێزیک کارگەهێن زڤراندنا بەرمایکان و چێکرنا کۆمپۆستا سروشتی دیتن. ئەڤ روژا مەیدانی یا تەکنیکی ب سەرەدانەکێ ب دوماهی هات بۆ پشکا پاقژکرنا ئاڤێ ل "ئەڤرۆ ستی" ژ پێخەمەت پشکینینا ژینگەها باژێڕی یا بەردەوام، ب تایبەتی پڕۆسەیا پاقژکرن و دووباره بەکارئینانا ئاڤا زێدەبار یا ئاکنجیبوونێ.

کۆلێژا پلانسازیا شار و هەرێمان بەردەوامە ل سەر دیارکرنا پێگیری و پابەندبوونا خۆ یا بەردەوام بۆ پشتەڤانیکرن و پێشکێشکرنا کەمپینێن کاریگەر یێن پاراستن و هۆشیارکرنا ژینگەهێ، ب مەرەما پاراستنا بەردەوامیا ژینگەهێ بۆ نەوەیێن پاشەڕۆژێ.